19-ամյա գյումրեցին նվաճել է ոսկե մեդալ՝ հետ թողնելով երկու թուրք մրցակիցների

19-ամյա գյումրեցի ծանրորդ Գառնիկ Չոլակյանը հռչակվել է ծանրամարտի՝ մինչև 20 տարեկանների Եվրոպայի չեմպիոն:

Ֆինլանդիայի Ռովանիեմի քաղաքում մեկնարկել է ծանրամարտի երիտասարդական և մինչև 23 տարեկանների Եվրոպայի առաջնությունը: Հայաստանը երկու տարիքային խմբերում ներկայացված է 17 մարզիկ-մարզուհիներով:

Մեր երկիրը ներկայացնող Գառնիկ Չոլակյանը մինչև 20 տարեկանների 55 կգ քաշայինների պայքարում երկամարտի 230 (100+130) արդյունքով նվաճել է ոսկե մեդալ՝ հետ թողնելով երկու թուրք մրցակիցների:

Պոկում վարժությունում Գառնիկ Չոլակյանը նվաճել է փոքր բրոնզե մեդալ, իսկ հրում վարժությունում բացահայտ առավելություն է ունեցել: Նա բարձրացրել է 130 կգ ծանրաձողը: Երրորդ մոտեցումից մեր մարզիկը հրաժարվել է:

Երկամարտում նա ցույց է տվել 230 (100+130) կգ և նվաճել է իր տարիքային խմբի Եվրոպայի չեմպիոնի կոչումը: Երկամարտի արդյունքով Գառնիկը 6 կգ-ով շրջանցել է երկրորդը ճանաչված մարզիկին:

Գառնիկ Չոլակյանը Գյումրիի օլիմպիական հերթափոխի պետական մարզական քոլեջի սան է։