1993 թվականից Երկիրը թեքվել է մոտ 80 սանտիմետրով․ և ամեն ինչ՝ մարդկանց պատճառով։ Սառցադաշտերի հալչելը և ստորգետնյա ջրերի սպառումը բարձրացնում են համաշխարհային օվկիանոսի մակարդակը։ Գիտնականների ուսումնասիրությունը ցույց է տվել, որ ջրի վերաբաշխումը նույնպես շեղում է Երկրի պտտման առանցքը։ Միջազգային հետազոտական խումբը պարզել է, որ 1993–2010 թվականներին Երկրի պտտման առանցքը շեղվել է մոտ 78,48 սանտիմետր։ Պատճառներից մեկը եղել է նաև ստորգետնյա ջրերի հանքագործական պոմպավորումը ոռոգման և խմելու նպատակներով։ Ուսումնասիրությունը հրապարակվել է Geophysical Research Letters հանդեսում։ Կլիմայական մոդելի գնահատմամբ՝ 1993–2010 թվականների ընթացքում ստորգետնյա ջրերի ընդհանուր նվազումը հասել է 2 150 գիգատոնի։ Դա համարժեք է համաշխարհային օվկիանոսի մակարդակի 6,24 միլիմետրով բարձրացմանը։ Ուսումնասիրության գլխավոր հեղինակ Սեուլյան ազգային համալսարանի (Seoul National University) երկրաֆիզիկոս Սո Կի Վոնը (Seo Ki-Weon) ասել է, որ տվյալները թույլ են տալիս բնապահպաններին և ջրային ռեսուրսների կառավարման մասնագետներին` մշակել այնպիսի միջոցներ, որոնք կարող են զսպել ծովի մակարդակի հետագա բարձրացումը և այլ կլիմայական հետևանքները։