2 միլիոն դրամ, 9 հազար դոլար, 3 հողամաս. ինչ ունեցվածք է հայտարարագրել Իշխան Զաքարյանը

ՀՀ Ազգային ժողովի «Պատիվ ունեմ» խմբակցության պատգամավոր, Հայաստանի Հանրապետության վերահսկիչ պալատի նախկին նախագահ Իշխան Զաքարյանը հոկտեմբերի 10-ին բարձրաստիճան պաշտոնատար անձանց էթիկայի հանձնաժողով է ներկայացրել պատգամավորական մանդատը ստանձնելու պահին իր գույքի և եկամուտների հայտարարագիրը:

Զաքարյանը հայտարարագրել է 3 հողամաս, որից մեկը նվիրատվություն է: Երևանի Նոր Նորք թաղամասում պատգամավորը հայտարարագրել է շինություն, որը դեռևս չի ստացել իրավունքների պետական գրանցում:

Որպես դրամական միջոց ընդդիմադիր պատգամավորը հայտարարագրել է 121 միլիոն 924 հազար դրամ: Որպես կանխիկ գումար Զաքարյանը հայտարարագրել է 2 միլիոն 800 հազար դրամ, 9 հազար 2 հարյուր դոլար, 26 հազար 8 հարյուր եվրո: 

Որպես աշխատավարձ Իշխան Զաքարյանը հայտարարագրել է 229 հազար 243 դրամ, ինչը ստացել է «Համահայկական խաղերի համաշխարհային կոմիտե» հասարակական կազմակերպությունից: