2022 թվականի հունվարի 1-ից ջրի սակագինը հնարավոր է բարձրանա

2022 թվականի հունվարի 1-ից ջրի սակագինը հնարավոր է՝ բարձրանա:

Այսօր այս մասին խորհրդարանում լրագրողների հետ զրույցում ասաց Հանրային ծառայությունները կարգավորող հանձնաժողովի նախագահ Գարեգին Բաղրամյանը։

Ըստ նրա՝ ենթադրվում է սակագնի որոշակի բարձրացում, որը կայուն կմնա 10 տարվա ընթացքում։

«Բարձրացման հայտը եղել է 43 դրամ՝ գործող 180-ի նկատմամբ։ Բայց ուզում եմ հիշեցնել, որ 2016 թվականի մրցույթով հաղթած բազիսային գինը 2022 թվականի համար արդեն 214 դրամ էր։ Մենք հիմա վերցնում ենք 214 դրամը և վրան ավելացնում այդ ճշգրտման գործակիցները»,- ասաց ՀԾԿՀ նախագահը:

Բաղրամյանի խոսքով՝ հանձնաժողովն առաջարկել է, որ սոցիալապես անապահով սպառողների համար գործի գործող 180 դրամ սակագինը․ «Մնացած սպառողների համար առաջարկում ենք այլևս բյուջեից վարձակալության վճարի նվազեցումներ, սուբսիդիաներ չանել, այլ ընդամենը 10 տարվա համար կայուն գնային քաղաքականություն ունենալ։ Նրանց համար կսահմանվի 200 դրամ սակագին»։

Նա նաև հայտնեց, որ որոշումը դեռևս վերջնական չէ: Նոյեմբերի վերջ կամ դեկտեմբերի սկիզբ ՀԾԿՀ-ն նիստ կհրավիրի. «Ես չեմ պնդում, որ բարձրանալու է, ես ասում եմ՝ քննարկվում է այդ առաջարկը»,- ասաց Բաղրամյանը: