44 անշարժ գույք, 1 մլրդ դրամ, 15 ընկերությունում բաժնեմաս․ ինչ ունեցվածք ունի Մհեր Սեդրակյանի որդին՝ Դավիթ Սեդրակյանը

ԱԺ «Հայաստան» խմբակցության պատգամավոր Դավիթ Սեդրակյանը, որը երեկ պատգամավորական մանդատից հրաժարվելու դիմում է ներկայացրել, 2021 թվականի սեպտեմբերի 14-ին բարձրաստիճան պաշտոնատար անձանց էթիկայի հանձնաժողով է ներկայացրել պատգամավորական մանդատը ստանձնելու պահին ունեցած իր գույքի և եկամուտների հայտարարագիրը: Որպես անշարժ գույք Սեդրակյանը հայտարարգրել է 17 հողամաս, 4 արտադրական նշանակության շինություն, 7 հասարակական նշանակության շինություն, 1 բնակարան, 2 անհատական բնակելի տուն, 7 բազմաբնակարան շենքի ոչ բնակելի տարածք և 6 ավտոկայանատեղի։ Շարժական գույք Սեդրակյանը չի հայտարարագրել։

Որպես արժեթղթեր և այլ ներդրումներ նա ներկայացրել է շուրջ 150 միլիոն դրամ։ Որպես կանխիկ գումար Սեդրակյանը հայտարարգրել է 1 միլիարդ 606 միլիոն 500 հազար դրամ և 540 հազար դոլար։ «Դռագսման» ՍՊԸ-ից վարձակալության դիմաց ստացել է 2 միլիոն 700 հազար դրամ, Արթուր Գևորգյանին գույք օտարելու դիմաց ստացել է 50 միլիոն դրամ, իսկ Գրիգոր Ավագյանին օտարելու դիմաց՝ 6 միլիոն 830 հազար դրամ։ «Ամերիաբանկ» ՓԲԸ-ում էլ ունի վարկ՝ 5 միլիոն 921 հազար 295 դրամ։

Նա 15 ընկերությունում բաժնեմաս ունի. «Դավիթ եւ Էլինա» ՍՊԸ՝ 15 տոկոս, «Դռագսման Սթոր» ՍՊԸ՝ 100 տոկոս, «Դռագսման» ՍՊԸ՝ 81 տոկոս, «Դռագսման Մարկետ» ՍՊԸ՝ 100 տոկոս, «Նարիպրոֆ» ՍՊԸ՝ 50 տոկոս, «Պարս» ՍՊԸ՝ 100 տոկոս, «Բիդեք» ՍՊԸ՝ 75 տոկոս , «Բեստ Ֆրենդս» ՍՊԸ՝ 25 տոկոս, «ԷՍԹԻԷՄ ՖԵՅՇՆ» ՍՊԸ՝ 25 տոկոս, «Գաջ» ՓԲԸ՝ 51 տոկոս, «Ավտոստոպ» ՍՊԸ՝ 100 տոկոս, «Էրեբունի մաքրություն» ՍՊԸ՝ 50 տոկոս, «Մհեր Սեդրակյան» ՍՊԸ՝ 60 տոկոս, «ECO FOREST F.Z.E.»՝ 100 տոկոս, «Դռագսման» ՍՊԸ՝ 19 տոկոս։ Դավիթ Սեդրակյանը Հայաստանի Հանրապետության կամ համայնքների հետ կնքված պայմանագրերով ստացել է շուրջ 2 միլիարդ դրամ գումար։