44-օրյա պատերազմի ժամանակ երկու ձեռքը կորցրած զինվորի համար առանձնատուն կկառուցվի

Արցախյան 44-օրյա պատերազմում  հակառակորդի անօդաչու թռչող սարքից արձակված ռումբի պայթյունի հետևանքով երկու ձեռքերը կորցրած 18-ամյա Կարեն Խլոպուզյանի համար  շուտով առանձնատուն կկառուցվի։ Այս մասին ֆեսբուքյան իր էջում հայտնել է «Իմ քայլը» խմբակցության պատգամավոր Արեն Մկրտչյանը։

Նրա փոխանցմամբ՝ Կարենի համար առանձնատուն կառուցելու պատրաստակամություն է հայտնել  Համբուրգի հայ համայնքի ղեկավար Սերժ Անգելյանը։

«Կարենը տուն չունի։ Տունը, որտեղ բնակվում են, սեփականության իրավունքով իրենցը չէ։ Համբուրգի հայ համայնքի ղեկավար Սերժ Անգելյանը չմերժեց խնդրանքս։ Կարենի համար Սարահարթում գեղեցիկ առանձնատուն կկառուցի` ջեռուցման համակարգով, ջերմամեկուսացմամբ, բոլոր հարմարություններով։ Նախագիծը պատրաստ է։ Քրոջ` Հերմինեի հետ զբաղված ենք թղթաբանական հարցերի լուծմամբ։ Պրն Անգելյան, բարեկամ, շնորհակալ եմ»,- գրել է Մկրտչյանը, հավելելով՝  «Կարենը շուտով նաև կպրոթեզավորվի։ Կառավարությունն ջանք ու միջոց չի խնայելու։ Նա վերականգնողական փուլ է անցել Զինվորի տանը` մեր հզոր բժիշկների հսկողությամբ»։

Պատգամավորը տեղեկացնում է՝ Կարենը Զինծառայողների ապահովագրության հիմնադրամից կստանա նաև 58 մլն դրամ, 10 մլն-ը` միանվագ, 48 մլն-ը` 20 տարում` ամսական 200.000 դրամ։

18-ամյա Կարեն Խլոպուզյանը Լոռու մարզի Ալավերդի քաղաքից է։ Բանակ է զորակոչվել  2020 թվականի հուլիսին, ծառայության անցել Հադրութում: Հոկտեմբերի 1-ին հակառակորդի անօդաչու սարքի արձակած ռումբի պայթյունից  ստացած վիրավորումից հետո տեղափոխվել է Ստեփանակերտ, որտեղ վիրահատվել  և տեղափոխվել է Երևան։

Հավելենք, որ Համբուրգի հայ համայնքի ղեկավարը նաև Աքորիում է տուն կառուցելու` 120 օրվա գերությունից վերադարձած Ա.Գ.-ի համար։