75 հազար եվրո արժեքով ժամացույց, 16 հազար դոլարանոց ոսկյա խաչ. Տիգրան Արզաքանցյանի ունեցվածքը

Հունիսի 20-ին կայանալիք խորհրդարանական ընտրություններում Հայաստանի դեմոկրատական կուսակցության վարչապետի թեկնածու Տիգրան Արզաքանցյանը Կենտրոնական ընտրական հանձնաժողով է ներկայացրել իր գույքի եւ եկամուտների հայտարարագիրը:

Ըստ հայտարարագրի՝ նա ունի 1 բնակարան եւ 1 տուն Գավառ համայնքում: Որպես շարժական գույք հայտարարագրել է 2008 թվականի արտադրության «BMW» ավտոմեքենա:

Որպես թանկարժեք գույք Տիգրան Արզաքանցյանը հայտարարագրել է ձեռքի ժամացույց՝ «Jaeger-LeCoultre», 75 հազար եվրո արժեքով, այլ ձեռքի ժամացույց՝ 52 հազար դոլար արժեքով եւ ոսկյա խաչ՝ 7 կտ ադամանդով, 16 հազար դոլար արժեքով:

Նա որպես եկամուտ հայտարարագրել է «Ցար Տիգրան» ՓԲԸ-ի ստացված ռոյալթի՝ 56 մլն 880 հազար դրամ:

Հայտարարագիրը ներկայացնելու օրվա դրությամբ Արզաքանցյանն ունեցել է 35 մլն դրամ, 80 հազար դոլար եւ 60 հազար եվրո:

ՀԴԿ առաջին համարը «AMGM» լյուքսեմբուրգյան ընկերությունում ունի 29 տոկոս բաժնեմաս, «Աշտարակյան գինիներ» ՓԲԸ-ում՝ 100 տոկոս բաժնեմաս, «Նիկելի սար» ՍՊԸ-ում՝ 100 տոկոս բաժնեմաս, «Գոլդեն վելլի» ՍՊԸ-ում՝ 100 տոկոս բաժնեմաս եւ «Գրանմաքս» ՍՊԸ-ում՝ (Ֆրանսիա) 53 տոկոս բաժնեմաս: