Սննդաբանը՝ մսից հրաժարվելու վնասների մասին

Սննդաբան Օլգա Չունտովան հայտնել է մսից հրաժարվելու վնասների մասին։ Лента պարբերականը փոխանցում է, որ ըստ բժշկի՝ կենդանական սպիտակուցից հրաժարվելու դեպքում օրգանիզմը դադարում է ստանալ կարևոր տարրեր՝ օրինակ՝ D, B12 վիտամիններ, ինչի պատճառով մեծանում է ինսուլտի վտանգը։ Օրգանիզմը դադարում է ստանալ նաև օմեգա-3 ճարպաթթուներ, կրեատին, խոլեստերին, յոդ, ֆոսֆոր և կալցիում։

Մասնագետը նշել է, որ այս ամենը կարող է հանգեցնել հորմոնալ խանգարման:

«Տուժում են մազերը, եղունգները, ոսկորները, վերարտադրողական ֆունկցիան։ Բացառելով կենդանական սպիտակուցը՝ մեծանում է նաև սակավարյունության առաջացման վտանգը»,- ասել է նա:

Սննդաբանը հավելել է, որ բուսական սպիտակուցը չի կարող փոխարինել կենդանական սպիտակուցին ո՛չ ամինաթթուների բաղադրությամբ, ո՛չ էլ յուրացմամբ:

Չունտովան մսից հրաժարված մարդկանց խորհուրդ է տվել չխմել շատ սուրճ և թեյ, քանի որ այդ երկու ըմպելիքները կարող են խոչընդոտել երկաթի ներծծմանը: Այս գործընթացը կարգավորելու համար նա խորհուրդ է տվել ուտե մթերքներ, որոնք պարունակում են ասկորբինաթթու: Բացի այդ, սննդակարգում պետք է ներառել ջրիմուռներ, չիայի սերմեր, ընկույզ, ձու, կտավատի սերմ: Այս մթերքները կօգնեն լրացնել կիսաչհագեցած ճարպաթթուների պակասը։

Սննդաբանն ընդգծել է, որ ցինկ կարելի է ստանալ ընկույզեղենից և լոբազգիներից, ամինաթթուներ՝ կաթնամթերքից։ Նաև, ըստ նրա, կակաչի սերմերը, քնջութի սերմերը, նուշը, ինչպես նաև երիտասարդ եղինջն ու մասուրը կօգնեն բարձրացնել կալցիումի պարունակությունը։