Օպերային սոպրանո Ջուլիանա Գրիգորյանը նախօրեին տեղադրել է «Մուսկատ» թագավորական օպերայում տեղի ունեցած «Տրավիատա» ներկայացման առաջնախաղի մասին, որտեղ նրա զուգընկերն էր ադրբեջանցի տենոր Յուսիֆ Էյվազովը։
Ջուլիանա Գրիգորյանը սոցիալական ցանցում երգչի հետ սիրառատ լուսանկարներով չի բավարարվել և գրառման մեջ հատուկ նշել է․ «Ես նաև անչափ երախտապարտ եմ ամբողջ դերասանական կազմին, որը շարունակեց աջակցել ինձ ամբողջ ընթացքում: Հատկապես իմ առաջին ֆանտաստիկ Ալֆրեդո` Յուսիֆ Էյվազովին»։
Այս հրապարակումներին անդրադարձել է ՀՀ ժողովրդական արտիստ, օպերային երգչուհի Հասմիկ Պապյանը, որը Ֆեյսբուքում բաց նամակ է ուղղել Ջուլիանա Գրիգորյանին։
«Սիրելի՛ Ջուլիանա, ավելորդ է ասել, թե հայ ժողովուրդը՝ այդ թվում նաև ես, որքան հպարտ ենք քո շարունակական հաջողություններով։ Երեք շաբաթ շարունակ քո էջում տեղադրում ես «Մուսկատ» թագավորական օպերայում տեղի ունեցած «Տրավիատա» ներկայացման առաջնախաղի մասին, որտեղ քո զուգընկերն էր «հարևան» երկրի հայտնի տենորը։ Իհարկե, խնդիր չկա, կարող ես նրան սիրել, հավանել որպես երգիչ, հիանալ, անվանել «ֆանտաստիկ»։ Ամեն դեպքում, Մայիսի 9-ին՝ ոչ վաղ անցյալում մեր փառապանծ Եռատոնի օրը, կարող էիր մեզ խնայել…,- նշել է Հասմիկ Պապյանը՝ հիշեցմամբ,- Տեղեկացնեմ քեզ, որ 2020-ի դեկտեմբերին քո սիրելի խաղընկերը, մշակույթի նախարարի հետ միասին, առաջինը երգեց Շուշիում, որպես հայերին հաղթած ժողովրդի արժանավոր զավակ։ Նաև ուզում եմ հիշեցնել, որ 2020-ի հունվարին՝ 44-օրյա պատերազմից առաջ, նա Դրեզդենում հրաժարվեց զուգերգ կատարել հայազգի Ռուզան Մանթաշյանի հետ՝ միայն վերջինիս ազգային պատկանելության պատճառով։ Իհարկե, գերմանացիները նրան «դարձի բերեցին», և Ռուզանը վերադարձավ ու միայնակ երգեց «Օպերային պարահանդեսին»։ Հետաքրքիր է իմանալ, արդյո՞ք քո խաղընկերը միևնույն ջանասիրությամբ և հրճվանքով իր էջերում լուսաբանում է հայ երգչուհու հետ ունեցած իր ելույթների մասին։ Վստահ չեմ…Կարիերան, հաջողությունները կանցնեն, կգնան, հայ լինելը և հայ մնալը՝ ոչ…»,- գրել է Հասմիկ Պապյանը։
Նշենք՝ 2021 թվականի մայիսին՝ հենց այս օրերին, ադրբեջանցի երգիչը հայկական Շուշիում էր։ Նա լուսանկարներ էր հրապարակել՝ ազդարարելով իրենց «վերադարձի» մասին։
Համիկ Պապյանի գրառման արվեստի շատ ներկայացուցիչներ են կարծիք հայտնել, ոմանք սա կապելով անտեղյակության հետ։
<<Կարծում եմ աղջիկը ուղղակի տեղյակ չի իրադարձություններից, կամ իրեն դա չի հետաքրքրում։ Ցավում եմ, բայց օտարամոլությունը, սեփական ազգի առժեքը չգնահատելը բերում է մեզ կործանման>>,-գրել է երգչուհի Աննա Մայիլյանը։
<<Ցավոք Մարգարիտա սիմոնյանները շատանում են.էդ տեսակը պիտի գոնե փոխի ազգանունն ու ազգությունը>>,-գրել է օգտատերերից մեկը։
Ի դեպ, հարևան երկրի օպերային երգիչն էլ արձագանքել է Ջուլիաննայի գրառմանը՝ նշելով, որ հպարտ է, որ Ջուլիաննան առաջին <<Տրավիատան>> իր հետ է երգել։ Ապա ավելացրել է․ <<Իմ սիրելի տղանդավոր սուպերսթար դու ֆանտաստիկ աշխատանք ես կատարել>>։
