83 արկղ նացիստական փաստաթղթեր և պրոպագանդայի նյութեր են հայտնաբերվել են Արգենտինայի Գերագույն դատարանի նկուղում։ Նյութերն աննկատ են մնացել ավելի քան 80 տարի։ Նյութերը հայտնաբերվել են դատական պատմության թանգարանը բացելու նախապատրաստական աշխատանքների ընթացքում։ Ըստ Արգենտինայի Գերագույն դատարանի տվյալների՝ արկղերը 1941 թվականի հունիսին Ճապոնիայում գտնվող Գերմանիայի դեսպանատնից Արգենտինա են ուղարկվել ճապոնական նավով։ Սակայն, երբ բեռը հասել է երկիր, արգենտինական մաքսային ծառայությունն այն առգրավել է` կասկածելով, որ կարող է խախտել Արգենտինայի չեզոքությունը Երկրորդ համաշխարհային պատերազմի տարիներին։ Չնայած Գերմանիայի՝ փաստաթղթերը վերադարձնելու փորձերին, արգենտինական իշխանությունները հրաժարվել են դրանք հանձնել, և արկղերը տեղափոխվել են Գերագույն դատարան, որտեղ էլ մնացել են մոռացված մինչև օրս։ Ի՞նչ է պարունակում արկղերը Այնտեղ հայտնաբերվել են Նացիստական կուսակցության անդամագրեր, գերմանական անձնագրեր, պրոպագանդիստական նյութեր, տեղեկատուներ և այլ փաստաթղթեր, որոնք կապված են Արգենտինայի նացիստական կողմնակիցների գործունեության հետ։ Գերագույն դատարանի նախագահ Հորասիո Ռոսատտին հրամայել է փաստաթղթերը տեղափոխել ապահով վայր և հանձնարարել Բուենոս Այրեսի Հոլոքոստի թանգարանին կատալոգացնել ու ուսումնասիրել դրանք։ Ենթադրվում է, որ այս նյութերը կարող են լույս սփռել. Արգենտինայում նացիստական համակիրների գործունեության, Նացիստական ռեժիմի հետ կապված ֆինանսական ցանցերի վրա, փախստականների մասին նոր տվյալներ տրամադրել։ Արգենտինան՝ որպես նացիստների ապաստան։ Արգենտինան, որը պաշտոնապես չեզոք է եղել մինչև 1944 թվականը, պատերազմից հետո դարձել է բազմաթիվ նացիստական հանցագործների ապաստան, այդ թվում՝ Ադոլֆ Էյխմանի (հայտնի որպես «Հոլոքոստի ճարտարապետ»), Իոսեֆ Մենգելեի («Անգել Մահվան», որը դաժան փորձեր էր կատարում համակենտրոնացման ճամբարներում)։ 2020 թվականին Արգենտինայում արդեն հայտնաբերվել էր 12,000 նացիստական համակիրների ցուցակ, և նոր գտածոն կարող է լրացնել այդ տեղեկատվությունը։ Չնայած նախնական տվյալներով՝ արկղերում չկան ուղղակիորեն ռազմական հանցագործներին վերաբերող փաստաթղթեր, սակայն դրանք կարող են արժեքավոր լինել նացիստական պրոպագանդայի և Հարավային Ամերիկայում նրանց ֆինանսական գործառնությունների ուսումնասիրման համար։ Արգենտինայի իշխանությունները նախատեսում են թվայնացնել փաստաթղթերը, հրապարակել դրանք հանրության համար, ուսումնասիրել երկրի դերը Երկրորդ համաշխարհային պատերազմի և հետպատերազմյան շրջանի իրադարձություններում։