«Աղմուկ բարձրացավ, որ Մարզահամերգային համալիրում տեղի է ունեցել հարսանիք: Այ, որ տարիներով մարզահամերգային համալիրը քանդվում-քայքայվում էր, և մենք այսքան միլիարդներ ենք դնում ու չենք կարողանում կանգնեցնել քայքայման պրոցեսը, բա պե՞տք է տնտեսվարությամբ զբաղվել: Բա մարզահամերգային համալիրում ի՞նչ պետք է տեղի ունենա: Այդ մասին Կառավարության՝ մայիսի 29-ի նիստին ասաց վարչապետ Նիկոլ Փաշինյանը՝ անդրադառնալով հանրության շրջանում քննարկման թեմա դարձած հարսանեկան միջոցառմանը, որը տեղի էր ունեցել մարզահամերգային համալիրում:
«Ընդհակառակը՝ պետք է քաջալերել: Այսօր Հայաստանից 100-ավոր ընտանիքներ գնում են, Դուբայում հարսանիք են անում, հետ են գալիս, իսկ որ այստեղ կարող է սննդի համակարգն աշխատել, կարող են երաժիշտները հավելյալ գումար ստանալ, դիզայներները հավելյալ գումար ստանալ, ծառայություն մատուցողները հավելյալ գումար ստանալ, հավելյալ հարկ վճարել և հավելյալ ծասխեր անելու հնարավորություն ունենալ, չէ՛, եկեք ձեռք չտանք, չմոտենանք համալիրին...»,- հավելեց Փաշինյանը։
Քաղաքաշինության դոկտոր Մարիամ Խաչատրյանի խոսքով՝ երբեմն կարող է կառույցը իրեն նման ճոխություն թույլ տալ՝ ինքնաֆինանսավորվելու համար։
«Մարզահամերգային համալիրում պետք է շատ համերգներ լինեին, բայց հիմա այդքան շատ ծանրաբեռնված չէ։ Ֆիզիկապես չի մաշվի, եթե այնտեղ այլ միջոցառում լինի։ Օրինակ Փարիզի Օրսեի թանգարանը, որը ներկայացնում է XIX դարի (1848 թվականից սկսած) և XX դարի (մինչև 1914) Եվրոպական արվեստը, տարին երեք անգամ փակվում է, նկարներն էլ կախված են մնում, չեն հավաքում։ Խոշոր կազմակերպությունները գումար են վճարում ու հավաքույթ են կազմակերպում։ Մի անգամ էլ այգիներից մեկը հնդիկ մեծահարուստի որդու հարսանիքի համար էին փակել։ Այնպես չէ, որ Մարզահամերգային համալիրը ռեստորանի պետք է վերածեն․ուղղակի դրսից ինչ բերեն՝ հետո պետք է հավաքեն ու տանեն»,-մեզ հետ զրույցում ասաց Մարիամ Խաչատրյանը։
Նրա փոխանցմամբ, Թամանյանն օշինություններերն այնպես է սարքել, որ որոշ հատվածներ օգտագործվեն։
«Ազգային պատկերասրահի շենքի, Օպերայի, Կասկադի հարթակները, պատշգամբները կարող են օգտագործել։ Ի՞նչ վատ կլինի, որ Օպերայի պատշգամբում նվագախումբը նվագի ու ներքևում մարդիկ լսեն։ Եվ փող կունենան և պետությունից անընդհատ փող չեն ուզի որևէ դահլիճ վերանորոգելու համար»,-նշեց մեր զրուցակիցը։