«Հայաստան» խմբակցության ղեկավար, Պաշտպանության նախկին նախարար Սեյրան Օհանյանի նկատմամբ հարուցվել է հանրային քրեական հետապնդում՝ ՀՀ Քրեական օրենսգրքով սահմանված մի շարք հոդվածներով։ Այս մասին «Արմենպրես»-ի հետ զրույցում հայտնել է Քննչական կոմիտեի նախագահի մամուլի քարտուղար Կիմա Ավդալյանը։
Նրա խոսքով՝ դատախազի կողմից կայացվել է որոշում Սեյրան Օհանյանի նկատմամբ քրեական հետապնդում հարուցելու վերաբերյալ և քննիչի կողմից վերջինիս մեղադրանք է ներկայացվել։
«Դատախազի կողմից որոշում է կայացվել Ս.Օ.-ի նկատմամբ ՀՀ Քրեական օրենսգրքի 441-րդ հոդվածի 2-րդ մասի 2-րդ, 4-րդ և 5-րդ կետերով (պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը), 435-րդ հոդվածի 3-րդ մասի 3-րդ կետով (կաշառք ստանալը), 296-րդ հոդվածի 3-րդ մասի 3-րդ կետով (փողերի լվացումը) և 444-րդ հոդվածի 2-րդ մասով (Հայաստանի Հանրապետության օրենսդրությամբ սահմանված` հայտարարագիր ներկայացնելու պարտականություն ունեցող անձի կողմից հայտարարագրում կեղծ տվյալներ ներկայացնելը, հայտարարագրման ենթակա տվյալները թաքցնելը կամ հայտարարագիր չներկայացնելը) հանրային քրեական հետապնդում հարուցելու մասին և քննիչի կողմից վերջինիս մեղադրանք է ներկայացվել»,- ասել է Ավդալյանը։
Նա նշել է նաև, որ Սեյրան Օհանյանը հրաժարվել է ցուցմունք տալուց։
«Նրա նկատմամբ որպես խափանման միջոց կիրառվել է բացակայելու արգելքը»,- ավելացրել է Ավդալյանը։
Բացակայելու արգելքը կիրառվել է նաև Արծվիկ Մինասյանի դեպքում։
«Հայաստան» խմբակցության քարտուղար Արծվիկ Մինասյանի նկատմամբ հարուցվել է հանրային քրեական հետապնդում՝ պաշտոնեական լիազորությունները չարաշահելու հատկանիշներով։ «Արմենպրես»-ի հետ զրույցում այս մասին ասել է ՔԿ մամուլի քարտուղար Կիմա Ավդալյանը։
«Դատախազի կողմից որոշում է կայացվել Ա․Մ-ի նկատմամբ ՀՀ Քրեական օրենսգրքի 441-րդ հոդվածի 2-րդ մասի 5-րդ կետով (պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը) հանրային քրեական հետապնդում հարուցելու մասին և քննիչի կողմից վերջինիս մեղադրանք է ներկայացվել։ Արծվիկ Մինասյանը հրաժարվել է ցուցմունք տալուց»,- նշել է Ավդալյանը։
Նա հայտնել է, որ Մինասյանի նկատմամբ որպես խափանման միջոց կիրառվել է բացակայելու արգելքը:
Հուլիսի 7-ին Հայաստանի Ազգային ժողովը կողմ էր քվեարկել «Հայաստան» խմբակցության քարտուղար Արծվիկ Մինասյանի նկատմամբ քրեական հետապնդում հարուցելուն։
Ըստ ներկայացված փաստերի՝ վերջինս 2016-2018 թթ. Բնապահպանության նախարարի պաշտոնում իր լիազորությունները չարաշահելով՝ խոչընդոտել է իրավական ընթացակարգերով ապօրինի զավթված հողատարածքի առգրավմանը, ընդհակառակը՝ մասնակցել է դրա օրինականացման գործընթացին։
Քննությունը բացահայտել է, որ Արծվիկ Մինասյանը տեղեկացված է եղել, որ նշված տարածքում ինքնակամ կառուցվել է առանձնատուն՝ Սեյրան Օհանյանի համար, սակայն պաշտոնապես մրցույթ է կազմակերպել տարածքը կառուցապատման իրավունքով փոխանցելու համար՝ ի վերջո ապահովելով նրա շահերը ներկայացնող անձի հաղթանակը։
Արծվիկ Մինասյանին մեղադրանք է առաջադրվելու Քրեական օրենսգրքի 308-րդ հոդվածի 2-րդ մասով՝ պաշտոնեական լիազորությունների չարաշահման համար, որի հետևանքով առաջացել են ծանր հետևանքներ։