«Օգոստոսի վերջին «Մուրացան» համալսարանական հիվանդանոց դիմեցին ծնողներ իրենց փոքրիկի հետ՝ գանգատվելով դժվարացած ու աղմկոտ շնչառությունից։
Ընդունման պահին երեխան ընդամենը 11 օրական էր։
Մեր անձնակազմի համախմբված թիմային աշխատանքի և արագ կազմակերպված բազմաթիվ հետազոտությունների արդյունքում երեխայի մոտ ախտորոշվեց քթըմպանի գոյացություն․ բացառիկ երևույթ այս տարիքային խմբում և կյանքին սպառնացող իրավիճակ»,-այս մասին ֆեյսբուքի իր էջում գրել է ԵՊԲՀ ռեկտոր Արմեն Մուրադյանը՝ հավելելով,
«Մանկական և նորածնային վերակենդանացման կլինիկայում հաջողվեց ապահովել վերին շնչուղիների անցանելիությունը ոչ ինվազիվ միջոցներով։ Սա հնարավորություն տվեց օպտիմալ պայմաններում ներգրավելու Հայաստանում ոլորտի լավագույն մասնագետներին։
Այնուհետև սեպտեմբերի 24-ին, ընդհանուր անզգայացման պայմաններում, բժիշկներ Գրիգորի Խաչատրյանը, Գնել Անանյանը և Նարեկ Մկրտչյանը իրականացրեցին Հայաստանում առաջին անգամ կատարված և համաշխարհային պրակտիկայում բացառիկ վիրահատություն։
Հաշվի առնելով վիրահատության ռիսկերը և հնարավոր բարդությունները՝ անզգայացումը վարեց կլինիկայի ղեկավար Հրանտ Կալենտերյանը։
Մի քանի ժամ անց երեխայի մոտ վերականգնվեց ինքնուրույն և անարգել շնչառությունը։ Այժմ փոքրիկի վիճակը բավարար է։
Առողջություն ենք մաղթում մեր բոլոր պացիենտներին»: