Ավստրիան պատրաստվում է ճանապարհային վերահսկողության լայնածավալ բարեփոխման․ 2026 թվականի մայիսի 1-ից մի շարք քաղաքներում կգործի տեսահսկման համակարգ, որը կֆիքսի ավտոմեքենաների մուտքը պահպանվող գոտիներ՝ բնակելի թաղամասեր, դպրոցների շրջակայք և պատմական կենտրոններ։ Ինչպես հայտնում է Kronen Zeitung-ը, ճանապարհային երթևեկության մասին օրենքում փոփոխությունների նախագիծը ներկայացրել է տրանսպորտի նախարար Պետեր Հանկեն։ Արդեն 25 քաղաք, այդ թվում՝ Վիեննան, Լինցը և Գրացը, հայտնել են ծրագրին միանալու պատրաստակամության մասին։ Նոր օրենքի համաձայն՝ տեսախցիկները ավտոմատ կերպով կընթերցեն բոլոր համարանիշերը և կհամեմատվեն թույլտրված ավտոմեքենաների բազայի հետ՝ բնակիչներ, առաքման ծառայություններ և արտակարգ ծառայություններ։ Առանց թույլտվության մուտքը կհամարվի վարչական խախտում․ տուգանքները կկազմեն 70-ից մինչև 2180 եվրո։ Վարորդների համար տեղադրվելու են հատուկ նախազգուշացնող նշաններ և ճանապարհային նշագրումներ՝ «Մուտքի վերահսկում» գրությամբ։ Տրանսպորտի նախարարությունը վստահեցնում է, որ համակարգը չի պահպանի անձնական տվյալներ, այլ միայն մեքենաների համարանիշերը՝ տվյալների պաշտպանության օրենքները չխախտելու համար։ Սակայն վերահսկողության տակ կհայտնվեն նաև արտասահմանյան մեքենաները։ Նախաձեռնության հիմնական նպատակն է՝ նվազեցնել աղմուկը, օդի աղտոտվածությունը և երթևեկության ծանրաբեռնվածությունն ավստրիական քաղաքների կենտրոններում։ Առավել ակտիվ սահմանափակումներ նախատեսում է ներդնել Վիեննան, որտեղ իշխանությունները ցանկանում են «վերադարձնել փողոցները մարդկանց, ոչ թե մեքենաներին»։