Նոր կանոնների համաձայն՝ Ռուսաստանի տարածքում շենգենյան վիզայի դիմում ներկայացնող քաղաքացիներին կտրամադրվի միայն մեկանգամյա մուտքի թույլտվություն։ Եվրահանձնաժողովի այս որոշումը պարտադիր է ԵՄ բոլոր անդամ երկրների համար։
«Մենք պարտավոր ենք պաշտպանել մեր քաղաքացիներին։ Այժմ ավելի խիստ կանոններ կկիրառվեն Ռուսաստանի քաղաքացիների նկատմամբ, ովքեր դիմում են ԵՄ մուտքի վիզա ստանալու համար։ ԵՄ ճանապարհորդելու և դրա տարածքում ազատ տեղաշարժվելու հնարավորությունը արտոնություն է, ոչ թե իրավունք»,- հայտարարել է ԵՄ դիվանագիտության ղեկավար Կայա Կալլասը։
Բացառություն կարվի միայն ԵՄ քաղաքացիների և մշտական բնակիչների ընտանիքի անդամների համար՝ ամուսինների, երեխաների և ծնողների։ Նրանց կարող են տրամադրվել բազմակի մուտքի վիզաներ։
Գերմանիայի արտաքին գործերի նախարարությունում հայտնել են, որ Գերմանիան կիրականացնի Եվրահանձնաժողովի պահանջը՝ սահմանափակելու ռուս քաղաքացիներին բազմակի շենգենյան վիզաների տրամադրումը։