Առաջիկայում հայկական բանկային քարտերով հնարավոր կլինի վճարումներ կատարել Ղրղզստանում և Ուզբեկստանում (փոխադարձության սկզբունքով): Համապատասխան համաձայնագրերն այսօր Երևանում ստորագրեցին Հայաստանի ազգային «ArCa» վճարային համակարգի գործադիր տնօրեն Վարդան Խաչատրյանը Ղրղզստանի իր գործընկերոջ՝ «Միջբանկային պրոցեսինգային կենտրոն» ՓԲԸ-ի ղեկավար Ալթիմիշ Տուրատբեկովի, ինչպես նաև Ուզբեկստանի «Hayot Bank»-ի մանրածախ բիզնեսի դեպարտամենտի տնօրեն Բեհզոդ Իսակժոնովի հետ:
Ինչպես Sputnik Արմենիայի հետ զրույցում նշել է Ալթիմիշ Տուրատբեկովը, առաջին փուլում ղրղզական «Էլքարտ» և հայկական «ArCa» քարտերի միջև կկարգավորվեն առցանց վճարումները, երկրորդ փուլից սկսած՝ քարտերը կսպասարկվեն այլ երկրների բանկոմատներում, երրորդ փուլում հնարավոր կլինեն QR-կոդերով վճարումները։ Այսինքն՝ Ղրղզստանի բնակիչները կկարողանան իրենց քարտից վճարումներ կատարել ՀՀ մանրածախ առևտրի կետերի QR կոդերի միջոցով, և հակառակը՝ հայկական քարտերով դա հնարավոր կլինի անել Ղրղզստանում, որտեղ նման կոդերի համար վաղուց գործում է միասնական չափորոշիչ, որը Հայաստանում գործարկվել է այս տարվա աշնանը։
QR կոդի միջոցով հնարավոր է վճարում կատարել քարտապանի բանկային հավելվածով՝ մանրածախ վաճառքի կետում տեղադրված կոդի ընթերցմամբ: Այսպիսով` անձը վճարում կարող է կատարել ոչ միայն քարտից, այլև անմիջապես հաշվից:
««Arca»-ի ղեկավարության հետ կկազմենք այդ ծրագրերի իրականացման մանրամասն ժամանակացույց։ Գործընթացը շատ երկար չի տևի, քանի որ Ուզբեկստանում և Ղազախստանում համակարգերի հետ նման ինտեգրման փորձ ունենք, այժմ այդպիսի աշխատանք է ընթանում Չինաստանի, ինչպես նաև «PayPal» միջազգային վճարային համակարգի հետ։ Հայաստանի հետ ինտեգրումը կարևոր է նաև այն պատճառով, որ մենք գտնվում ենք միասնական տնտեսական դաշտում, որտեղ չպետք է լինեն նաև ֆինանսական խոչընդոտներ», - ասել է Տուրատբեկովը։
Ուզբեկական «Hayot Bank»-ի հետ համաձայնագիրը կվերաբերի փոխադարձ QR- վճարումների կազմակերպմանը։ Հայաստանի և Ուզբեկստանի բնակիչները, այցելելով միմյանց երկրներ, կկարողանան իրենց բանկային հավելվածով QR-կոդերի ընթերցմամբ վճարումներ կատարել տեղական խանութներում և սրճարաններում: Նույն հնարավորությունը Հայաստանում կգործի նաև «Hayot Bank»-ի քարտապանների համար: Ինչպես Sputnik Արմենիայի հետ զրույցում նշեց Բեհզոդ Իսակժոնովը, QR-վճարումների առավելությունն այն է, որ դրանք ակնթարթային են կատարվում։
Նրա խոսքով՝ Ուզբեկստանում դեռևս չկա միասնական վճարային QR կոդ, բայց այն առանձին-առանձին ունեն և՛ բանկերը, և՛ «Ուզքարտ» ազգային վճարային օպերատորը: Հայկական քարտապանների համար հասանելի կլինեն վճարումներ «Hayot Bank»-ի և «Ուզքարտ»-ի QR-կոդերով (ամբողջ Ուզբեկստանում գործում է ընդհանուր առմամբ մոտ 100 հազար կետ):
Իսակժոնովը նշեց` Հայաստանը Հարավային Կովկասի առաջին երկիրն է, որի հետ բանկը նման համաձայնագիր է կնքում: Նմանատիպ նախագծեր բանկն իրականացնում է նաև հարևան երկրների (Չինաստան, Ղազախստան, Տաջիկստան, Ղրղզստան) հետ: