Նոյեմբերի 30-ին Օմանի ազգային թանգարանում հանդիսավոր կեպով բացվել է «Խնկի ճանապարհին․ Հայաստան» միջազգային ցուցահանդեսը։
ՀՀ Պատմության թանգարանից հայտնում են, որ բացման հանդիսավոր արարողության ընթացքում ելույթներ են ունեցել Օմանի Սուլթանության Արտաքին գործերի նախարարության մշակութային համագործակցության բաժնի ղեկավար, դեսպան Աբդուլահ բին Համադ Ալ-Ռայամին, Օմանի Սուլթանությունում Հայաստանի Հանրապետության արտակարգ և լիազոր
դեսպան Հրաչյա Փոլադյանը և Հայաստանի պատմության թանգարանի տնօրեն Դավիթ Պողոսյանը։
Ցուցահանդեսի շրջանակներում Հայաստանի պատմության թանգարանի հավաքածուից երկու ուշագրավ բուրվառներ (Անի, 13-րդ դար և Աշտարակի Սուրբ Մարիանե եկեղեցի, 18-րդ դար) վեց ամսով համադրվել են Օմանի ազգային թանգարանի «Խնկի երկիր» ցուցադրական հատվածում տեղակայված և Օմանից ու աշխարհի այլ երկրներից խնկի մշակույթին վերաբերող ցուցանմուշների հետ։
Ցուցահանդեսի գաղափարը քննարկվել է Օմանի Ազգային թանգարանում այս տարվա փետրվարին Հայաստանի պատմության թանգարանի տնօրեն Դավիթ Պողոսյանի և Օմանի ազգային թանգարանի գլխավոր-քարտուղար Ջամալ Ալ-Մուսավիի հանդիպման ընթացքում։ Առաջիկա տարիների նախատեսվում շարունակել երկու թանգարանների համատեղ ցուցադրական գործունեությունը Հայաստանում և Օմանում։ Միջազգային ցուցահանդեսը կազմակերպվել է Հայաստանի պատմության թանգարանի և Օմանի ազգային թանգարանի համագործակցությամբ, Հայաստանի Հանրապետության կրթության, գիտության, մշակույթի և
սպորտի նախարարության, Հայաստանի Հանրապետության և Օմանի Սուլթանության արտաքին գործերի նախարարությունների աջակցությամբ։
Օմանի ազգային թանգարանում բացվել է «Խնկի ճանապարհին․ Հայաստան» միջազգային ցուցահանդեսը
