AstraZeneca-ով պատվաստումը կսկսվի վաղը. դրանով կպատվաստվեն 55 տարեկանից բարձր անձինք, Sputnik V-ով՝ 18-55 տարեկանները

«Հայաստանում AstraZeneca-ով պատվաստումը կիրականացվի միայն 55 տարեկանից բարձր քաղաքացիների համար: Այս պատվաստանյութով պատվաստումները նախատեսվում են սկսել վաղը՝ ապրիլի 13-ից, իսկ Sputnik V-ով՝ 2-3 օր ուշացմամբ»,- այս մասին այսօր հրավիրած ասուլիսում հայտնեց ՀՀ առողջապահության նախարար Անահիտ Ավանեսյանը:

«AstraZeneca պատվաստանյութի օգտագործման ցուցումներով որոշակի փոփոխություններ են կատարվել: Մասնագիտական կառույցների կողմից տրված խորհրդատվությունների հիման վրա մենք որոշում ենք կայացրել, որ AstraZeneca-ով պատվաստման համար ևս կսահմանենք տարիքային շեմ: Պատվաստում կիրականացնենք միայն 55 տարեկանից բարձր ռիսկի խմբի քաղաքացիների համար: Ռիսկի առաջին խումբը 65 տարեկան եւ բարձր տարիքի քաղաքացիներն են, բուժաշխատողները՝ 55 տարեկանից բարձր, քրոնիկ հիվանդները՝ 55 տարեկանից բարձր, սոցիալական խնամքի կենտրոնների բնակիչները եւ աշխատակիցները եւս 55 տարեկանից բարձր»,- ասաց նախարարը:

Անահիտ Ավանեսյանը նշեց, որ Sputnik V պատվաստանյութի խմբաքանակը սահմանափակ է, օգտագործման ցուցումներում եւս սահմանել են որոշակի խմբեր, սակայն ցուցումները ժամանակի ընթացքում կվերանայվեն, եթե Sputnik V-ի նոր խմբաքանակ ներմուծվի, 65-ից բարձր տարիքի քաղաքացիները եւս կարող են պատվաստվեն Sputnik V-ով:

«Sputnik V-ով կպատվաստվեն հետեւյալ խմբերը՝ բուժաշխատողներ՝ 18-54 տարեկան, քրոնիկ հիվանդություն ունեցող անձինք՝ մինչեւ 54 տարեկան, սոցիալական խնամքի կենտրոնների բնակիչները եւ աշխատակիցները՝ եւս մինչեւ 55 տարեկան»,- ասաց նախարարը:

Նախարարը ներկայացրեց նաեւ, թե ինչու է նման բաժանում կատարվել.

«Բաժանումը կատարվել է, որպեսզի բուժաշխատողների համար հստակ եւ հասկանալի լինեն չափորոշիչները, եւ մարդիկ չունենան տարընկալումներ, թե ում ինչ պատվաստանյութով պատվաստում պետք է անեն: Եվ քանի որ առաջնահերթություն է հնարավորինս շատ անձանց պատվաստել և հնարավորություն տալ հիվանդանալուց զերծ մնալու, իսկ անգամ հիվանդանալու պարագայում այն թեթև ընթացքով տանելու համար, մենք այսպիսի քաղաքականություն ենք որդեգրել»,- ասաց Ավանեսյանը:

Նախարարը նշեց նաեւ, որ Astrazeneca պատվաստանյութի առաջին խմբաքանակը՝ 24 հազար դեղաչափ, ձեռք է բերվել COVAX FACILITY նախաձեռնության միջոցով: Իսկ ռուսական Sputnik V պատվաստանյութի առաջին խմբաքանակը՝ 15 հազար դեղաչափ, բերվել է ապրիլի 8-ին: