BBC-իի նոր ապացույցը․սիրիացի վարձկանները պատմել են Արցախում պատերազմի մասին

BBC-ն նոր ապացույցներ է ներկայացրել Արցախում պատերազմական գործողություններում սիրիացի վարձկանների մասնակցության մասին:

Լրատվամիջոցը գրում է, որ մինչ Ադրբեջանն ու Թուրքիան հերքում են վարձկանների մասնակցությունը, 4 վարձկաններ իրենց պատմությունն են պատմել:

Ըստ այդմ՝ դեռ օգոստոսին Սիրիայի հյուսիսում լուրեր են տարածվել, թե արտերկրում գործ կա, որը լավ վարձատրվում է: Համաձայն դրանց՝ պետք է ուղղակի հսկողություն իրականացվի Ադրբեջանի հսկիչ անցագրային կետերում՝ մոտավորապես խաղաղապահների նման: Այդ կերպ 1500-2000 մարդ հավաքագրվեց: Բայց ծառայությունն այն չեղավ, ինչ խոստացել էին:

Վարձկաններին, որոնց մեծ մասը մարտական փորձ չի ունեցել, իրենց կամքին հակառակ մարտադաշտ են ուղարկել և ստիպել կռվել: BBC-ի տվյալներով՝ վարձկաններին կենտրոնացրել են հարավային ուղղության վրա՝ իրանական սահմանի մոտ, որտեղ երկու կողմերի կորուստներն ամենաշատն են եղել: Վարձկանները պատմել են, որ իրենք ուժեղ կրակահերթի տակ են եղել, իսկ օրեր անց նաև բարոյապես շատ վատ վիճակում:

«Ես փրկվելու հույս չունեի։ Թվում էր, թե շանսերը հարյուրից մեկն են։ Մահը մեր շուրջը էր», – ասել է Կուտայբան: