COVID19-ի դեմ պատվաստումների հաջորդ փուլում 55 տարեկանից բարձր անձինք կպատվաստվեն «Sputnik V» պատվաստանյութով

«Այս պահին Հայաստանն ունի «Sputnik V» պատվաստանյութի շատ սահմանափակ քանակ: Հաջորդ ներկրումների դեպքում նախատեսվում է 55 տարեկանից բարձր անձանց պատվաստել «Sputnik V» պատվաստանյութով»: Այս մասին այսօր Ազգային ժողովում լրագրողների հետ ճեպազրույցի ընթացքում ասաց առողջապահության նախարար Անահիտ Ավանեսյանը:

«Քանի որ «Sputnik V»-ի քիչ քանակությամբ պատվաստանյութ ունենք, դա հաշվի առնելով՝ նաև կայացրինք նման որոշում: Հաջորդ ներկրումների դեպքում, երբ Հայաստանը ստանա պատվաստանյութի նոր խմբաքանակներ, մեր քաղաքականությունը կփոխվի, և 55-ից ավելի բարձր քաղաքացիները ևս կպատվաստվեն այդ պատվաստանյութով»,-ասաց նախարարը:  

Նա նաև պարզաբանեց, թե ինչ չափորոշիչներով է որոշվել կորոնավիրուսային հիվանդության դեմ առաջին պատվաստումը սկսել 55 տարեկանից բարձր անձանց շրջանում և «AstraZeneca» պատվաստանյութով:

«Այդ որոշումը կայացվել է մասնագիտական կառույցներից տրված եզրակացությունները հանգամանալից ուսումնասիրելու արդյունքում, դիտարկելով նաև այլ երկրների փորձը: Այսինքն՝ որոշեցինք 55 տարեկանից ցածր անձանց շրջանում չօգտագործել այդ պատվաստանյութը»,- մանրամասնեց Ավանեսյանը:

Նախարարը շեշտեց՝ այժմ պատվաստումները հիմնական նպատակ ունեն՝ կանխարգելել մարդկանց շրջանում հիվանդության տարածումը և մահվան ելքով դեպքերը:

Առողջապահության նախարարությունը ավելի վաղ հայտարարել էր, որ երեկվանից Երևանի, այսօրվանից մարզերի պոլիկլինիկաներում պետք է սկսվեին կորոնավիրուսային հիվանդության դեմ «AstraZeneca» պատվաստանյութով պատվաստումները: Առաջին այդ փուլում պատվաստվում են ռիսկային առաջին խմբի 65 տարեկանից բարձր անձինք: