Facebook-ը կփոխի անվանումը

Facebook ընկերությունը նախատեսում է հաջորդ շաբաթ փոխել անվանումը, հայտնում է Verge պորտալը՝ հղում անելով իր աղբյուրին։«Facebook»-ը նախատեսում է հաջորդ շաբաթ փոխել անվանումը, որպեսզի այն արտացոլի նրա ուղղվածությունը «մետատիեզերքի» կառուցմանը»,-ասվում է կայքում հրապարակաված հաղորդագրության մեջ։

Սոցիալական ցանցի ղեկավար Մարկ Ցուկերբերգը նախատեսում է ընկերության վերանվանումը քննարկել Facebook Connect ամենամյա համաժողովի ընթացքում, որը տեղի կունենա հոկտեմբերի 28-ին, սակայն փոփոխությունների մասին կարող են ավելի վաղ հայտարարել։Պորտալի տվյալներով՝ ռեբրենդինգի արդյունքում Facebook հավելվածը կդառնա գլխավոր ընկերության վերահսկողության տակ գտնվող բազմաթիվ հավելվածներից մեկը։

Նոր անվանումը խիստ գաղտնի է պահվում, անգամ ղեկավար կազմի ոչ բոլոր անդամները գիտեն այն։ Ենթադրվում է, որ այն կարող է ինչ-որ կերպ կապված լինել Horizon-ի՝ Facebook-ի ներկայացրած վիրտուալ գրասենյակի հետ։«Մետատիեզերքը», ինչպես ավելի վաղ հայտարարել էր Facebook-ի ղեկավար Մարկ Ցուկերբերգը, մեծ հնարավորություններ կընձեռի ստեղծագործական մասնագիտությունների մարդկանց, նրանց, ովքեր ուզում են ապրել և աշխատել քաղաքի կենտրոնից հեռու, ինչպես նաև այն տարածքներում ապրող մարդկանց, որտեղ սահմանափակ է կրթության կամ վերականգնման օբյեկտների հասանելիությունը։

Facebook սոցիալական ցանցը հիմնադրվել է 2004 թ․-ին՝ 19-ամյա ամերիկացի ուսանող Մարկ Ցուկերբերգի կողմից։ Շտաբ-բնակարանը տեղակայված է Մենլո-Պարկում (Կալիֆորնիա)։ Facebook-ին են պատկանում նաև Messenger-ը, WhatsApp-ն ու Instagram-ը։Ցուկերբերգը երրորդ տեղն է զբաղեցնում ամենահարուստ ամերիկացիների ցուցակում, սեպտեմբերի սկզբին նրա կարողությունը գնահատվում էր 134,5 միլիարդ դոլար։