Flyone Armenia-ն Հայաստանում ստացել է օդանավ շահագործողի վկայական. շուտով թռիչքներ կիրականացնեն

Հայկական շուկա է մուտք գործում նոր ավիաընկերություն. Քաղաքացիական ավիացիայի կոմիտեն օդանավ շահագործողի վկայական է տրամադրել Flyone Armenia ավիաընկերությանը:

Ընկերությունը ֆեյսբուքյան իր էջում հայտնում է, որ շատ շուտով թռիչքներ են իրականացվելու Հայաստանից։

Երևանի օդանավակայանից ընկերությունը թռիչքներ կիրականացնի դեպի Մոսկվա, Կրասնոդար, Թեհրան, Լիոն, Փարիզ, Քութայիսի, Թբիլիսի, Ստամբուլ, Թել Ավիվ:

Ընկերության պաշտոնական կայքում նշվում է, որ այս պահի դրությամբ FLYONE ARMENIA ընկերությունը ավելի քան 60 մլն եվրո է ներդրել հայկական շուկայում, ինչը նպաստում է երկրի տնտեսության աճին։

Ընկերությունը նաև նախատեսում է ստեղծել աշխատատեղեր՝ ավելի քան 135 աշխատակցից բաղկացած թիմ՝ միջինից բարձր աշխատավարձով։ Եվ սա միայն մեկնարկի սկզբնական փուլում. ապագայում կաճի և՛ աշխատակիցների, և՛ ինքնաթիռների թիվը։

Ավիաընկերության նավատորմը բաղկացած է Airbus A320 ընտանիքի ինքնաթիռներից։ Դրանք նախատեսված են 180 նստատեղի համար և համապատասխանում են Օդային տրանսպորտի միջազգային ասոցիացիայի (IATA) և EASA Security-ի բոլոր չափանիշներին, ինչպես նաև համաճարակի պայմաններում ինքնաթիռները հագեցված են HEPA օդային զտիչներով, որոնք ոչնչացնում են վիրուսների և բակտերիաների 99,97%-ը: