«Sputnik V» պատվաստանյութի 1 մլն դեղաչափ ձեռք բերելու պայմանավորվածությունն ուժի մեջ է. Տիգրան Ավինյան

armtimes.com-ը գրում է․«Sputnik V» պատվաստանյութի 1 մլն դեղաչափ ձեռք բերելու պայմանավորվածությունն ուժի մեջ է: Այս մասին այսօր լրագրողների հետ զրույցում «AstraZeneca» պատվաստանյութով պատվաստվելուց հետո ասաց ՀՀ փոխվարչապետ Տիգրան Ավինյանը՝  անդրադառնալով այն հարցին, թե արդյոք ուժի մեջ է ՀՀ վարչապետ Նիկոլ Փաշինյանի և ՌԴ նախագահի Վլադիմիր Պուտինի միջև  ձեռք բերված պայմանավորվածությունը՝ Ռուսաստանից 1 մլն դեղաչափ ստանալու մասին:

«Այո, այդ պայմանավորվածությունն ուժի մեջ է: Եվ որոշակի գործընթացներ տեղի են ունենում: Մենք բոլոր հնարավոր պատուհաններն օգտագործելու ենք և ֆինանսական միջոցները հատկացնելու ենք, որպեսզի ապահովենք լուրջ խմբաքանակ՝ այս տարվա պատվաստումների համար»,- ասաց Ավինյանը:

Ըստ նրա՝ պետությունը դիտարկում է բոլոր այն պատվաստանյութերը, որոնք Հայաստանում հաստատված են:

Առողջապահության նախարար Անահիտ Ավանեսյանն էլ հիշեցրեց, որ 2 օր առաջ ստացվել է «Sputnik V-ի» երկրորդ խմբաքանակը՝ 14 հազար հոգու համար: «Հաջորդիվ կունենանք նոր խմբաքանակների ներմուծումը, ինչպես ՀՀ վարչապետի և ՌԴ նախագահի միջև կայացված համաձայնությունն է եղել»,- նշեց նա՝ հավելելով, որ միանգամից ստանալ ամբողջ պատվաստանյութը հնարավոր չէ, այն բոլոր երկրներին էլ բաժանվում է հատվածական:

Անդրադառնալով այն հարցին, թե արդյոք Հայաստանում Sputnik V-ի համատեղ արտադրություն կսկսվի՝ Ավինյանն ասաց, որ պատվաստանյութը արտադրելու հնարավորությունները պետք է դեռևս հետազոտել: «Ենթադրում եմ, որ Մոլեկուլային կենսաբանության մեր ինստիտուտում է դա հնարավոր կազմակերպել: Ռուս գործընկերների հետ մի փոքր ավելի մանրամասն պետք է հասկանալ, թե ինչ չափով, որ կոմպոնենտներով հնարավոր կլինի այդ արտադրությունը կազմակերպել այստեղ», – նշեց նա: