Երևան քաղաքի 2807-րդ տարեդարձի առթիվ, Երևան քաղաքի արվեստի զարգացման գործում ներդրած նշանակալի ավանդի համար գրականագետ, բանասիրական գիտությունների դոկտոր, պրոֆեսոր, ՀՀ արվեստի վաստակավոր գործիչ Ավետիք (Ավիկ) Վիգենի Իսահակյանին շնորհել «Երևանի պատվավոր քաղաքացի» կոչում։ Նախագիծն ընդգրկված է Երևանի ավագանու հոկտեմբերի 23-ի նիստում։

Ավետիք Իսահակյանը ծնվել է 1944 թվականի նոյեմբերի 27-ին, Երևանում։ Նա հայ
բանաստեղծ, արձակագիր Ավետիք Իսահակյանի թոռն է:
1952-1962թթ. սովորել և ավարտել է Երևանի Պ. Չայկովսկու անվան երաժշտական
միջնակարգ դպրոցը:
1963-1967թթ. բարձրագույն ուսումը ստացել է Երևանի պետական համալսարանի
բանասիրական ֆակուլտետի լրագրության բաժնում: Այնուհետև՝ 1968-1972թթ.
ընդունվել է պետհամալսարանի ասպիրանտուրա, ուսումը որպես ասպիրանտ անց է
կացրել ՍՍՀՄ գիտությունների ակադեմիայի Մ.Գորկու անվան Համաշխարհային
գրականության ինստիտուտի ասպիրանտուրայում:
1973թ. Երևանի պետհամալսարանում պաշտպանել է ատենախոսություն՝
«Ազատության կոնցեպցիան Ավ. Իսահակյանի արձակում» թեմայով և ստացել
բանասիրական գիտությունների թեկնածուի գիտական աստիճան:
1974թ. ընդունվել է աշխատանքի ՀՀ ԳԱԱ արվեստի ինստիտուտում, որպես
կրտսեր գիտաշխատող: 1977թ. տեղափոխվել է աշխատանքի ՀՀ ԳԱԱ Մ. Աբեղյանի
անվան գրականության ինստիտուտ: 1987թ. պաշտպանել է ատենախոսություն՝
«Ավ. Իսահակյանը և ռուս գրականությունը» թեմայով և ստացել բանասիրական
գիտությունների դոկտորի գիտական աստիճան:
1986-1988թթ. համատեղության կարգով աշխատել է որպես Երևանի Ե. Չարենցի
անվան գրականության և արվեստի պետական թանգարանի տնօրեն: 1989թ.՝
Մ. Աբեղյանի անվան գրականության ինստիտուտի Տեքստաբանության բաժնի վարիչ:
2008թ. ընտրվել է ՀՀ ԳԱԱ Մ. Աբեղյանի անվան գրականության ինստիտուտի տնօրեն
և աշխատել մինչև 2015թ.: 2015 թվականից նույն ինստիտուտի Տեքստաբանության
բաժնի վարիչն է և ինստիտուտի տնօրենի խորհրդականը՝ մինչև օրս:
1975-1993թթ. և 2000-2008թթ. հայ և համաշխարհային գրականություն է
դասավանդել Երևանի պետհամալսարանում, իսկ 1999-2009թթ.՝ Երևանի Հրաչյա
Աճառյան համալսարանում:
1972թ. Հայաստանի ժուռնալիստների միության անդամ է, 1977թ.՝ Հայաստանի
գրողների միության անդամ:
Պատրաստել է հրատարակության, կազմել, խմբագրել և առաջաբան է գրել
Ավ. Իսահակյանի քսանից ավել գրական երկերի, որոնք հրատարակվել են Երևանում,
Մոսկվայում, Վենետիկում, Լոս Անջելեսում, Դամասկոսում:
Հեղինակ է 300-ից ավելի գիտական աշխատությունների, հրապարակումների և
հոդվածների:
1998 թվականից ՀՀ ԳԱԱ Մ. Աբեղյանի անվան գրականության ինստիտուտում
ղեկավարում է Ավ. Իսահակյանի երկերի լիակատար հրատարակության (14 հատորով)
գիտական խումբը:
Ավետիք Իսահակյանի գրչին են պատկանում «Ավ. Իսահակյանի արձակը»
(1975թ.), «Ավ. Իսահակյանը և Ռուսաստանը» (ռուսերեն, Մոսկվա, 1988թ.),
«Ավ. Իսահակյան. գիտական կենսագրություն» (2000թ.), «Ավ. Իսահակյանի պոեմները»
(2007թ.), «Բարև, Վարպետ» (2008թ.), որտեղ մանրամասնորեն ներկայացվում է անցյալ
դարի, Ավ. Իսահակյանի ժամանակների Երևանը, «Երևանը երազում է արթմնի, երկու
դարի միջև» (2 հատորով, 2014թ.), նաև ռուսերեն «Ереван во сне и наяву» (2016թ.), «Սա
իմ ընտրությունն է» (վեպ, նաև ռուսերեն, 2021թ.), «Սևանա կղզի» (հուշապատում,
2022թ.) գրքերը:
2009թ. Ավետիք Իսահակյանն արժանացել է ԲՈՀ-ի կողմից պրոֆեսորի
պատվավոր կոչմանը, 2012թ.՝ ՀՀ արվեստի վաստակավոր գործչի կոչմանը,
պարգևատրվել է Մովսես Խորենացի մեդալով և այլ մեդալներով: 2012թ. արժանացել է
«Գյումրու պատվավոր քաղաքացի» կոչմանը: