Շաքարային դիաբետով հիվանդների համար նախատեսված խելացի սարքերի շուկայում տեղի է ունեցել մեծ ձախողում։ Արյան գլյուկոզայի մակարդակը վերահսկող և տվյալները ավտոմատ վերլուծող գլյուկոմետրերը մեղավոր են համարվել մի շարք մահերի և լուրջ բարդությունների առաջացման մեջ։
Այս մասին պաշտոնապես տեղեկացնում է ԱՄՆ Սննդի և դեղերի վարչությունը (FDA)։
Ինչպե՞ս կարող էր նման բան տեղի ունենալ
Խոսքը վերաբերում է հանրահայտ FreeStyle Libre 3 համակարգերին։ Այն փոքրիկ սենսոր է, որն ամրացվում է ձեռքին ու ավտոմատ սմարթֆոնին փոխանցում է գլյուկոզայի չափումները։ Սրա շնորհիվ՝ շաքարային դիաբետով հիվանդը կարող է ցանկացած պահի իմանալ իր գլյուկոզայի մակարդակը։
«Յոթ մահ և ավելի քան 700 դեպք, որոնցում լուրջ վնաս է հասցվել դիաբետով հիվանդների առողջությանը, կապված են Abbott Diabetes Care ընկերության արտադրած հանրահայտ թվային գլյուկոզայի մոնիտորի սխալների հետ», — aif.ru-ին պատմել է կենսաֆիզիկոս, կենսաբանական գիտությունների դոկտոր, ՌԴ Ոչ իոնացնող ճառագայթումների պաշտպանման ազգային կոմիտեի նախագահ Օլեգ Գրիգորևը։
«Սարքն աշխատում է այսպես․ սենսորը տեղադրվում է հիվանդի մարմնին և ռադիոհաճախականությունների միջոցով փոխանցում է տվյալները սմարթֆոնին, որտեղ դրանք վերլուծվում են ծրագրով։ Որոշ մոնիտորներ տրամադրել են սխալ տվյալներ։ Այդ սխալների հետ առնչվում են առնվազն յոթ մահվան դեպքեր և 736 լուրջ վնասվածք ամբողջ աշխարհում։
FDA-ն զգուշացնում է, որ նման խնդիր կարող է ունենալ մոտ 3 միլիոն FreeStyle Libre 3 և FreeStyle Libre 3 Plus սենսոր։ Սխալ ցուցանիշները կարող են հանգեցնել սխալ բուժման։ Մինչ այժմ հասկանալի չէ՝ սխալը տեղի է ունենում հենց սենսորի կողմից տվյալների ստացման փուլում, ռադիոհաճախական փոխանցման ժամանա՞կ, թե՞ արդեն ծրագրային վերլուծության ընթացքում»։
Կլինի՞ արդյոք ավելի վատ
Ընկերության տվյալներով՝ որոշ սարքեր հատկապես ցածր գլյուկոզայի մակարդակների դեպքում են տալիս սխալ ցուցանիշներ։ FDA-ի համաձայն՝ դիաբետով հիվանդներն այս պատճառով կարող են ընդունել սխալ որոշումներ՝ չափազանց շատ ածխաջրեր օգտագործել, բաց թողնել ինսուլինի ներարկումները կամ ուշացնել դրանք։
Սա կարող է հանգեցնել ինչպես կյանքի համար վտանգավոր ծանր հետևանքների և նույնիսկ մահվան, այնպես էլ՝ բուժման ընթացքի լուրջ խանգարումների։