Հայաստանի ծանրամարտի պատանիների հավաքականի անդամ Գրիգոր Ղազարյանը, որը այս տարի դարձել էր աշխարհի չեմպիոն, այժմ նաև Եվրոպայի չեմպիոն է:

Այս մասին հայտնել է Ծանրամարտի ֆեդերացիան:

Իսպանիայի մայրաքաղաք Մադրիդում ընթացող պատանիների Եվրոպայի առաջնության տղաների 84 կգ քաշային կարգում Հայաստանի ընտրանու անդամ Գրիգոր Ղազարյանը պոկում վարժությունում երեք հաջող մոտեցում է ունեցել՝ 140 կգ, 145 կգ, 148 կգ:

Պոկում վարժության երրորդ մոտեցմամբ 148 կգ Ղազարյանը սահմանել է պատանիների Եվրոպայի նոր ռեկորդ: Պոկում վարժությունում հայ ծանրորդը նվաճել է ոսկե մեդալ:

Հրում վարժության առաջին մոտեցմամբ Ղազարյանը բարձրացրել է 180 կգ՝ սահմանելով Եվրոպայի նոր ռեկորդ հրում վարժությունում ու երկամարտում:

Ղազարյանը թարմացրել է սեփական ռեկորդը՝ հրում վարժությունում գլխավերևում պահելով 185 կգ ու 190 կգ: Այս ձևում ևս նա ոսկե մեդալակիր է:

Երկամարտի 338 կգ արդյունքով Գրիգոր Ղազարյանը 2025 թվականի պատանիների Եվրոպայի առաջնության չեմպիոն է: