Թուրքիայի նախագահ Ռեջեփ Թայիփ Էրդողանը մասսայական արշավ է սկսել ճարպակալման դեմ. այժմ քաղաքացիներին կարող են հանրայնորեն կշռել փողոցում։ Ինչպես հաղորդում է «Berliner Morgenpost»-ը, սանիտարական ծառայությունների աշխատակիցներն այգիներում, ավտոբուսի կանգառներում և ֆուտբոլային հանդիպումներից առաջ կանգնեցնում են անցորդներին և չափում նրանց քաշն ու հասակը։
Չափումներից հետո հաշվարկվում է մարմնի զանգվածի ինդեքսը (BMI). եթե այն 25 կամ ավելի է, անձին ուղարկում են բժիշկների մոտ՝ քաշը կարգավորելու առաջարկություններ ստանալու համար։ Արշավն անցկացվում է «Պարզիր քո քաշը – ապրիր առողջ» կարգախոսով և կտևի մինչև հուլիսի 10-ը։ Այս ընթացքում նախատեսվում է կշռել երկրի մոտ տասը միլիոն բնակչի, ինչը կազմում է Թուրքիայի բնակչության մոտավորապես մեկ ութերորդ մասը։
Առողջապահության համաշխարհային կազմակերպության տվյալներով՝ Թուրքիայի բնակչության ավելի քան 30%-ը տառապում է ճարպակալումով, ինչը գրեթե երկու անգամ բարձր է Եվրամիության միջին ցուցանիշից։ Օրինակ Գերմանիայում քաղաքացիների մոտ ճարպակալման մակարդակը կազմում է մոտ 19%։
Նոր միջոցառումը սոցիալական ցանցերում քննադատության ալիք է առաջացրել։ Քաղաքացիները վախենում են, որ կշռումը կդառնա հարկադրական ընթացակարգ և կարող է վերածվել հանրային նվաստացման։