Bloomberg-ը, հղում անելով խնդրին ծանոթ աղբյուրներին, հաղորդում է, որ Թուրքիան քննարկում է առաջիկա վեց ամսվա ընթացքում Հայաստանի հետ ցամաքային սահմանը բացելու հարցը։
Գործակալությունը հիշեցնում է, որ Թուրքիան սահմանը փակել է 1993 թվականին՝ Լեռնային Ղարաբաղի հակամարտության հարցում Ադրբեջանի հետ համերաշխության ֆոնին։ Ըստ Bloomberg-ի՝ Բաքվի հետ հարաբերություններում դիվանագիտական առաջընթացը և Թուրքիայի հետ սահմանի բացումը զգալի առավելություն կտան Հայաստանի վարչապետ Նիկոլ Փաշինյանին հունիսյան ընտրություններում։
Աղբյուրները հայտնում են, որ եթե նա հաղթի, Բաքուն և Երևանը կկարողանան վերջնականապես կնքել խաղաղության համաձայնագիր, որից հետո Թուրքիան կարող է դեսպան նշանակել Հայաստանում և վերականգնել դիվանագիտական հարաբերությունները։
Օգոստոսի 8-ին Ադրբեջանի նախագահ Իլհամ Ալիևը և Փաշինյանը Վաշինգտոնում ԱՄՆ նախագահ Դոնալդ Թրամփի հետ եռակողմ հանդիպումից հետո ստորագրել են համատեղ հռչակագիր։ Այն ներառում է յոթ կետ, որոնք ընդգծում են Բաքվի և Երևանի խաղաղության ձգտումը։
Փաստաթղթում նշվում է, որ կողմերը նախաստորագրել են խաղաղություն հաստատելու և հարաբերությունները վերականգնելու մասին պայմանագրի համաձայնեցված տեքստը և կաշխատեն դրա վերջնական վավերացման ուղղությամբ։
Աղբյուրը՝ Հանրային ռադիո