Ռուսաստանի Արտաքին գործերի նախարար Սերգեյ Լավրովը, ով հրաժարվել է Ստամբուլ մեկնել բանակցությունների՝ քննադատել է Ուկրաինայի նախագահին։ Մոսկվայում հանդես գալով՝ նա հայտարարել է, որ Վլադիմիր Զելենսկին «խղճուկ մարդ» է, քանի որ պնդում է Վլադիմիր Պուտինի անձնական մասնակցությունը բանակցություններին։
Լավրովը նաև հարձակվել է Կիևի արևմտյան դաշնակիցների վրա՝ նրանց աջակցությունը անվանելով «պատերազմին դրդել»։ «Ո՛չ Բեռլինը, ո՛չ Փարիզը, ո՛չ Բրյուսելը, ո՛չ Լոնդոնը չեն ցանկանում Ուկրաինայում խաղաղություն։ Արևմտյան մայրաքաղաքները գնում են բախման Ռուսաստանի հետ»,-հայտարարել է ՌԴ ԱԳ նախարարը։
Նրա խոսքով՝ արևմտյան երկրները ձգտում են հրադադարի միայն այն նպատակով, որպեսզի «պատրաստեն Կիևին մարտական գործողությունների շարունակմանը»։
Մոսկվայից հնչած այս հայտարարությունների ֆոնին ԱՄՆ նախագահ Դոնալդ Թրամփը ակնարկել է, որ ինքը խաղաղ բանակցություններից որևէ կոնստրուկտիվ արդյունք չի սպասում մինչև իր անձնական հանդիպումը Վլադիմիր Պուտինի հետ։
«Ոչինչ չի փոխվի, քանի դեռ ես և Պուտինը չենք նստել մի սեղանի շուրջ»,-լրագրողներին ասել է Թրամփը։
Իր հերթին Զելենսկին Անկարայում մամուլի ասուլիսի ընթացքում հայտարարել է, որ բանակցություններին ուկրաինական պատվիրակությանը կգլխավորի երկրի պաշտպանության նախարար Ռուսլան Ումերովը։ Ուկրաինայի նախագահը հաստատել է, որ պատվիրակություն կուղարկի Ստամբուլ, սակայն ինքը չի մեկնի։