ՀԷՑ-ի ժամանակավոր կառավարիչ Ռոմանոս Պետրոսյանն այսօր հայտարարել է, որ ՀԷՑ-ի թոփ մենեջմենթի շրջանում ազատումներ կլինեն, սակայն հերքել է մասսայական ազատումների մասին լուրերը։
Նա նշել է, որ ընկերությունում կան մասնագետներ, «էներգետիկ համակարգի վաստակաշատ գործընկերներ», որոնք հետագայում եւս պիտի ապահովեն ՀԷՑ-ի աշխատանքը։
Մասնավորապես՝ փոխտնօրեն, գլխավոր տնօրենի պաշտոնակատարի մասին նշել է. «Դավիթ Ղազինյանը ձև չունի մնալու։ Ես կարող եմ դա ձեզ ասել, որովհետև [ՀԷՑ-ը] հենց այս վիճակին կարծես թե հասցնողներից մեկը նույն այդ պաշտոնյան է»։
Ռոմանոս Պետրոսյանը հայտարարել է, որ էներգետիկ ընկերության պետական կառավարում նշանակելը քաղաքական գործընթացների հետ չի կարելի կապել։
Ըստ նրա՝ գործընթացն սկսվել է գրեթե 1 տարի առաջ Ազգային ժողովում լսումներով, «որի հետևանքով 2 բարձրաստիճան պետական պաշտոնյաներ են ազատվել աշխատանքից… Կարծես թե սեփականատերերը այդ ամբողջ գործընթացի կուլմինացիան, վերջնարդյունքը կանխազգալով` պրոցեսը տարան քաղաքական դաշտ»։