Իրավապաշտպան Զարուհի Հովհաննիսյանը ֆեյսբուքի իր էջում գրել է․«Մի քանի օր է Հայաստանում փնտրում էին Չեչնիայից Հայաստան տեղափոխված Այշատ Բայմուրադովային։ Այսօր պարզվեց, որ Այշատը սպանվել է Երևանում։ Այշատ Բայմուրադովան 23 տարեկան էր։ Ըստ նախնական տվյալների փախել էր Չեչնիայից՝ փորձելով ազատվել բռնությունից։ Փորձելով նոր կյանք սկսել մի երկրում, որտեղ, թվում էր, անվտանգ կլինի։
Եվ ահա՝ Երևանում, որտեղ նա պիտի իրեն ապահով զգար, նրա կյանքն ընդհատվեց։ Նրան որոնում էին մի քանի օր շարունակ։ Ընկերներն ասում էին՝ 15-ին գնացել էր հանդիպման՝ Instagram-ով ծանոթացած մի աղջկա հետ։ Հետո պարզվել է, որ այդ աղջկա հետևորդների մեջ կան մարդիկ՝ Ռամզան Կադիրովի շրջապատից։ Հետո լռություն։ Հետո՝ մարմինը գտած վարձով բնակարանում։ Հայաստանը պետք է դառնար ապաստանի վայր, այլ ոչ գերեզման նրա համար։
Որպես կանանց իրավունքների պաշտպանությամբ զբաղվող և նախկինում նաև ապաստարանների հետ գործ ունեցած անձ ասեմ, որ Չեչնյայից փախած կանայք պնդում էին, որ եթե ամուսինները գտնեն իրենց հետքը, կենդանի կթաղեն։ Գաղտնիության պահպանումը թիվ մեկ խնդիրն էր, որպեսզի որևէ կերպ նրանց չհայտնաբերեն Հայաստանում։
Այս պատմությունը սարսափելի է ոչ միայն նրա համար, որ երիտասարդ կին է սպանվել, այլև սա հակամարդկային համակարգի ձեռքերի երկարացման ապացույցն է։ Այն համակարգի, որն իր քաղաքացիներին հալածում է նույնիսկ դրսում, այն կանանց, որոնք փորձել են ազատվել բռնությունից։ Նրանք իրավազուրկ էակներ են, իրենց կյանքի վերաբերյալ որևէ որոշում չեն կարող կայացնել, նրանց ստիպողաբար ամուսնացնում են, նրանք իրենց ընտանիքների ու ամուսինների սեփականությունն են, ու պետությունը որևէ քայլ չի ձեռնարկվում նրանց պաշտպանելու այդ մարդատյաց համակարգից»։
Հիշեցնենք, որ հոկտեմբերի 19-ին ՆԳՆ ոստիկանության օպերատիվ կառավարման կենտրոն է զանգահարել մի քաղաքացի և հայտնել, որ Երևանի Դեմիրճյան փողոցի վարձակալության տրված բնակարաններից մեկում կնոջ դի կա։
Այս մասին հայտնել են ՆԳՆ ոստիկանությունից՝ հավելելով, որ նշված վայր են մեկնել ՆԳՆ ոստիկանության օպերատիվ խմբեր։
«Պարզվել է, որ հայտնաբերվածը հոկտեմբերի 17-ից որպես անհետ կորած որոնվող 23-ամյա Այշատ Բայմուրադովայի դիակն է։
Նշանակվել են փորձաքննություններ։ Հանգամանքները պարզվում են։ Կատարվում է նախաքննություն»,- ասվում է հաղորդագրության մեջ: