Ֆրանսիայի նախագահ Էմանուել Մակրոնը և նրա կինը՝ Բրիջիտ Մակրոնը, չորեքշաբթի օրը զրպարտության համար հայց են ներկայացրել ԱՄՆ-ում՝ ընդդեմ աջակողմյան ազդեցիկ անձնավորություն և փոդքաստեր վարող Քենդիս Օուենսի։ Հայցի կենտրոնում Օուենսի պնդումն է, թե Ֆրանսիայի առաջին տիկինը տղամարդ է։ Մակրոնները Դելավերի նահանգի Գերագույն դատարան ներկայացրած բողոքում նշել են, որ Օուենսը ստով լի «համաշխարհային նվաստացման արշավ» է սկսել՝ իր փոդքաստը խթանելու և երկրպագուների «մոլեգին» շուկան մեծացնելու նպատակով։ «Օուենսը մանրամասն վերլուծել է նրանց արտաքին տեսքը, ամուսնությունը, ընկերները, ընտանիքը և անձնական պատմությունը՝ ամեն ինչ վերածելով զզվելի պատմության, որի նպատակը վիրավորելն ու սադրելն է»,_նշված է բողոքում։ Բողոքում նաև ասվում է. «Արդյունքում մենք առերեսվել ենք համաշխարհային մասշտաբով անընդհատ կատարվող բուլինգի»։ Չորեքշաբթի իր փոդքաստում Օուենսն ասել է. «Այս դատական հայցը լի է փաստական անճշտություններով» և որ այն «ակնհայտ ու հուսահատ փորձ է՝ վատաբանել իմ կերպարը»։ Նա նաև նշել է, որ տեղյակ չի եղել, թե նման հայց է ներկայացվելու, չնայած երկու կողմերի փաստաբանները շփվել են դեռ հունվարից։ Օուենսի խոսնակն էլ հայտարարել է, թե հայցը ինքնին փորձ է՝ ճնշում գործադրելու նրա վրա, այն բանից հետո, երբ Բրիջիտ Մակրոնը մերժել է Օուենսի՝ հարցազրույցի մի քանի անգամ կրկնվող առաջարկները։ «Սա օտար երկրի կողմից հարձակում է՝ Ամերիկայի անկախ լրագրողի վրա»,–ասել է խոսնակը։ Իրենց փաստաբանների միջոցով տարածած համատեղ հայտարարությամբ Մակրոնները նշել են, որ հայց են ներկայացրել նրանից հետո, երբ Օուենսը մերժել է զրպարտչական հայտարարությունները հերքելու պահանջ։ «Օուենսի զրպարտչական արշավը բացահայտորեն նպատակաուղղված էր մեզ ու մեր ընտանիքներին վրդովեցնելուն և ցավ պատճառելուն, ինչպես նաև ուշադրություն ու համբավ ձեռք բերելուն։ Մենք նրան բոլոր հնարավորությունները տվեցինք՝ հրաժարվելու այդ պնդումներից, սակայն նա մերժեց », – նշել են Մակրոնները։