Ամերիկացի գիտնականները առաջընթաց են գրանցել ծանր դեպրեսիայի բուժման մեջ։ New Scientist ամսագրի հաղորդմամբ՝ առաջին անգամ վերջին 30 տարվա ընթացքում 44-ամյա հիվանդը զգացել է ուրախություն՝ շնորհիվ եզակի իմպլանտի, որը հիշեցնում է սրտի ռիթմավար սարք, բայց նախատեսված է ուղեղի համար։ Տղամարդը դեռ պատանեկությունից ունեցել է դեպրեսիա։ Այդ տարիների ընթացքում նա փորձել է բոլոր հնարավոր բուժման մեթոդները, սակայն ոչինչ չի օգնել։ Անգամ երեք անգամ փորձել է ինքնասպան լինել։ Այդ ժամանակ Մինեսոտայի համալսարանի գիտնականները վերլուծել են նրա ուղեղի չորս հատվածների աշխատանքը, որոշել ազդեցության համար ամենաօպտիմալ կետերը և ստեղծել են հատուկ ծրագիր։ Իմպլանտի տեղադրումից 9 ամիս անց հիվանդի վիճակը կայունացել է, որը պահպանվում է արդեն 2,5 տարուց ավելի։ Սարքը յուրաքանչյուր 5 րոպեն մեկ խթանում է ուղեղի տարբեր հատվածներ։ Իմպլանտի աշխատանքի համար տղամարդու պարանոցին ամրացվել է փոքրիկ մարտկոց։ Գիտնականները նախատեսում են իրականացնել լայնածավալ կլինիկական հետազոտություն՝ մեթոդի արդյունավետությունն ու անվտանգությունը հիվանդների խմբի մոտ ստուգելու համար։ Փորձարկումները կարող են սկսվել առաջիկա երկու տարվա ընթացքում։