Ապրիլի 18-ն ամբողջ աշխարհում նշվում է որպես Հուշարձանների և տեսարժան վայրերի միջազգային օր։ Օրվա շրջանակում Հայաստանի պատմության թանգարանում կայացավ պանելային քննարկում՝ «Հուշարձանների և տեսարժան վայրերի ներկայացման խնդիրները» խորագրով։
Հայաստանի պատմության թանգարանի տնօրեն Դավիթ Պողոսյանը խոսելով հուշարձանների պահպանության, դրանց արժևորման և կարևորության մասին՝ ընդգծեց, որ օրը կարևոր է ոչ միայն միմյանց շնորհավորելու առումով, այլև պետք է փորձենք քննարկել առկա հարցերը։
«Հայաստանի համար պատմական հուշարձանները երևի ամենամեծ հարստությունն են։ Բացի դրանից առանձնապես շատ բան չունենք։ Ոչ արաբական երկրների նման հարուստ երկիր ենք, ոչ էլ մեծ հանքեր ունենք։ Պատմական հուշարձաննեը մեզ համար ռազմավարական նշանակություն ունեն»,-իր խոսքում նշեց ՀՀ ԳԱԱ Հնագիտության և ազգագրության ինստիտուտի տնօրեն, պ․գ․դ․ Արսեն Բոբոխյանը։
Պրոֆեսիոնալ զբոսավարների հայկական ասոցիացիայի նախագահ Յաշա Սոլոմոնյանի դիտարկմամբ՝ մեր երկրում պակասում է կառավարման օղակը։
«Չունենք գեթ մեկ հուշարձան, որի մասով կա պետական կառավարման ծրագիր, ռազմավարություն։ Այս պահին ընթացքի մեջ է Տաթևի վանքի կառավարման պլանը։ Այս տարի նոր Կառավարությունը սկսել է հետազոտել զբոսաշրջային այցերը․տարիք, սեռ։ Մինչև 2025թ․ չունենք տվյալ, թե ՀՀ ի՞նչ տարիքի, նախասիրության հյուրեր են եկել»,-ասաց Յաշա Սոլոմոնյանը։
Խոսելով հուշարձանների և տեսարժան վայրերի մասին՝ պրոֆեսիոնալ զբոսավարների հայկական ասոցիացիայի նախագահը նշեց․ «Նորավանքում ունենք հրաշալի պահպանված միջնադարյան տապանաքարեր, որոնց արձանագրությունները մեր աչքի առջև մաշվում են, քարերը ճաքում։ Պետք է քայլեր ձեռնարկել, օրինակ, ապակեպատել։ Հեռու չգնանք․Գառնիի բաղնիքը10 տարուց ավելի է՝ քանդվում է․խճանկարները։ Ամեն տարի քանդման այդ սահմանն ընդլայնվում է»։