Հակակոռուպցիոն քաղաքացիական դատարանում այսօր՝ մայիսի 26-ին, տեղի ունեցավ ՀՀ 2-րդ նախագահ Ռոբերտ Քոչարյանի ավագ որդու՝ Սեդրակ Քոչարյանի, ու նրա կնոջ՝ Զարուհի Բադալյանի ենթադրյալ ապօրինի ծագում ունեցող գույքի բռնագանձման գործով դատական նիստը։ Այն նախագահում է դատավոր Կարապետ Բադալյանը։ Հաղորդում է iravaban.net-ը։
Կայքի փոխանցմամբ՝ այս նիստին պատասխանողեր Սեդրակ Քոչարյանի և Զարուհի Բադալյանի ներկայացուցիչ Հարություն Հարությունյանը ներկայացրեց արագացված դատաքննություն կիրառելու և հայցն ակնհայտ անհիմն լինելու հիմքով մերժելու մասին միջնորդություն։
«Այն հանցավոր արարքը, որը վերագրվում է Սեդրակ Քոչարյանին, դրա հիմքն ամբողջությամբ դատարանի ուժի մեջ մտած ակտով վերացված է, ու մեղադրանքի հիմք այլևս գոյություն չունի»,-ասել է Հարությունյանը՝ ընդգծելով, որ ներկայացված հայցադիմումով բացակայում է որև փաստ, որը հիմք կարող է հանդիսանալ պնդելու, որ ենթադրյալ հանցագործության ու հնարավոր տնտեսական ակտիվների ավելացման միջև կա պատճառահետևանքային որևէ կապ։
Նա նշել է, որ այս դեպքում գործ ունեն քրեական վարույթի հիման վրա ներկայացված հայցի հետ, իսկ ՍԴ որոշմամբ արձանագրվել է՝ ապօրինի ծագում ունեցող գործերով պատճառահետևանքային կապի անհրաժեշտությունը պարտադիր է։
«Ունենք իրավիճակ, երբ այս հայցի պատճառով իմ վստահորդներին պատկանող գրեթե բոլոր սեփականության օբյեկտներն արգելադրված են՝ հնարավոր բարենպաստ դատական ակտի դեպքում կատարման խոչընդոտ չառաջացնելու պատճառաբանությամբ»,-ասել է փաստաբանը։
Մանրամասները՝ սկզբնաղբյուր կայքում