Ֆրանսիայի նախկին նախագահ Նիկոլա Սարկոզին, որն այդ պաշտոնը զբաղեցրել է 2007-2012 թվականներին, բանտում իր առաջին օրը սկսել է գիրք գրել, ըստ նրա փաստաբան Ժան-Միշել Դարոյի։

«Նա մի քիչ մարզանք է արել և սկսել է գրել իր գիրքը», – BFMTV-ն մեջբերել է նախկին նախագահի փաստաբանին։ Նա ասել է, որ պետության նախկին ղեկավարը 9 քառակուսի մետրանոց խցում է։ «Անընդհատ աղմուկ է», – ասել է Դարոյը։

Հիշեցնենք, որ Փարիզի դատարանը Ֆրանսիայի նախկին նախագահ Նիկոլա Սարկոզիին մեղավոր է ճանաչել հանցավոր դավադրության մեջ՝  2007 թվականին նրա ընտրարշավի ժամանակ լիբիական ֆինանսավորման գործի շրջանակներում: Այդ մասին հաղորդում է Reuters -ը։ Նշվում է, որ դատարանը Սարկոզիին դատապարտել է 5 տարվա ազատազրկման։ Դուրս գալով դատարանի դահլիճից` Սարկոզին խոսել է «սկանդալային» որոշման վերաբերյալ` նշելով. «Այսօր տեղի ունեցածը չափազանց լուրջ է օրենքի գերակայության և արդարադատության համակարգի նկատմամբ վստահության առումով։ Եթե նրանք անպայման ուզում են, որ ես բանտում քնեմ, ես բանտում կքնեմ, բայց գլուխս բարձր»։ Սարկոզին նաև պնդել է, որ անմեղ է. «Ես ներողություն չեմ խնդրի այն բանի համար, ինչը չեմ արել»-ասել է նա։